- 297 -

1374. März 23. Liegnitz.

Die Herzoge Ruprecht, Wenzel, Bonzlaus und Heinrich verschreiben der Gemahlin Herzog Ruprechts, Frau Hedwig, lebenslänglich von ihrem liegnitzer Erbgeschoss jährlich 100 Schock Mark Groschen.

Wir Ruprecht, Wenczlaw, Bonczlaw vnd Heynrich, gebruder von gotez genaden, herczogen yn Slezien vnd herren czu Lignicz vnd czume Goltberge, bekennen vffentlich mit desem briue allen den, die een sehen, horen lesen adir lesen, daz wir vnser lieben getrouwen ratlute czu Legnicz mit wolbedochtem rate vnser frunde vnd vnser getrouwen, geheysen haben vnd heysen geben der hochgebornen furstinne, frouwen Hedwygen, herczog Ruprechtez eelichen housfrouwen, alle jare jerlich hundirt schock Pregisscher grosschen Polanisscher czal vnsers erbgeschossez, daz wir haben czu Lignicz vff vnser stat, die wyle, daz see lebet, vnd daz neste jar noch erme tode, wenne den got gebatet, vnschedlich erme liepgedinge, vnd sullen dieselben hundirt schok vns abeslan alle jare an vnserme erbgeschozze. Dez haben wir see vnser borger, die eegenante, an die, die eegenante frouwe gewyset yn der mose, alze vorgeschreben stet; alzo doch, daz die selben hundirt schok noch erme tode, alze vorgeschreben stet, wedir an vns . . herczog Ruprecht vnd an vnser geerben, adir an vnser rechten nachkomelinge ane aliirhande wedirwertlichkeyt sullen gevallen. Dez czu orkunde haben wir en desen kegenwortegen briff geheyzen geben vorsegelt mit vnserme gemeynen anhangenden ingesegel czu Lignicz, noch Cristi geburde dryczenhundirt jare yn deme vier vnd sebenczegsten jare an deme dunrstage vor Palmen.

O. d. St. L. No. 142. Das vorige Siegel an Pergamentstreifen. — Bitschens Privilegb. f. CXXXI.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866